Ponte Prizreni ka mposhtur Sigal Prishtinën në kryeqytet me rezultat 70:80 (18:18, 12:27, 15:12, 25:23), në kuadër të javës së 12-të të Prince Caffe Superligës së Kosovës në basketball, njofton Insajderi.
Çereku i parë ishte i baraspeshuar dhe këtë e dëshmon edhe rezultati, i cili ka përfunduar me rezultat të barabartë 18:18.
Periudha e dytë ishte vendimtare në këtë përballje. Mysafirët nga Prizreni e fitojnë këtë pjesë 12:27, për të shkuar në pushim me rezultat 30:45.
Në pjesën e dytë u zhvillua lojë më e barabartë, 15:12 dhe 25:23, megjithatë, Ponte Prizreni triumfoi në fund me dhjetë pikë diferencë, 70:80, që ishte e shtata fitore radhazi në këtë edicion të Superligës.
Te Sigal Prishtina u dalluan Fisnik Rugova me 19 pikë e 10 kërcime, Daniel Lekndreaj me 12 pikë e tetë kërcime dhe Meriton Ismaili me 12 pikë, kurse te Ponte Prizreni më të mirët ishin Josh Martin me 18 pikë e 18 kërcime dhe Arti Hajdari me 23 pikë.
Sigal Prishtina ka tri fitore dhe nëntë humbje, kurse Ponte Prizreni nëntë fitore dhe tri humbje. /Insajderi.com
