Mirel Josa e Bledi Shkëmbi e njohin shumë mirë njëri-tjetrin. Kanë bashkëpunuar katër vjet te Skënderbeu i Korçës dhe kanë fituar katër tituj të Shqipërisë në futboll, si dhe dy Superkupa. Josa ishte trajner, ndërsa Shkëmbi kapiten i skuadrës.
Njohuritë që kanë për njëri-tjetrin, Josa e Shkëmbi të shtunën (sot) do të mundohen t’i shfrytëzojnë kundër njëri-tjetrit. Ndoshta për herë të parë do të jenë në taborë të ndryshëm, taborë kundërshtarë. Dhe kjo në cilësinë e trajnerit, shkruan sot Koha Ditore.
Josa do të jetë shef i stolit të Prishtinës, ndërsa Shkëmbi shef i stolit të Lirisë kur dy skuadrat do të përballen në Prizren në kuadër të xhiros së 14-të të Vala Superligës së Kosovës në futboll. Ndeshja Liria – Prishtina luhet të shtunën (sot, 13:00) në stadiumin “Përparim Thaçi”.
