Drejtori ekzekutiv i Pfizer, Albert Bourla tha se njerëzit “me gjasë” do të kenë nevojë për një dozë përforcuese të një vaksine Covid-19 brenda 12 muajve nga vaksinimi i plotë.
Sipas CNBC komentet e tij u bënë publike të enjten por u regjistruan në 1 prill, njofton Insajderi.
Bourla tha se është e mundur që njerëzit do të duhet të vaksinohen kundër Coronavirus-it çdo vit.
“Një skenar i mundshëm është që ka të ngjarë të ketë një nevojë për një dozë të tretë, diku midis gjashtë dhe 12 muaj dhe pastaj prej andej, do të ketë një rivaksinim vjetor, por e gjithë kjo duhet të konfirmohet. Dhe përsëri, variantet do të luajnë një rol kryesor”, tha ai.
Studiuesit ende nuk e dinë se sa zgjat mbrojtja ndaj virusit derisa dikush të jetë vaksinuar plotësisht.
Pfizer tha në fillim të këtij muaji se vaksina e saj Covid-19 ishte më shumë se 91% efektive në mbrojtjen kundër Coronavirusit dhe më shumë se 95% efektive kundër sëmundjes së rëndë deri në gjashtë muaj pas dozës së dytë.
Vaksina e Moderna, e cila përdor teknologji të ngjashme me atë të Pfizer, gjithashtu u tregua shumë e efektshme në gjashtë muaj. /Insajderi.com
