Të paktën tre persona, përfshirë dy ushtarë, u vranë në kryeqytetin e Somalisë sot në mëngjes në një shpërthim bombe që kishte në shënjestër një automjet ushtarak në të cilin ndodhej stafi i lartë, transmeton Insajderi.
Disa të tjerë u plagosën në sulmin që ndodhi në rrugën Abdikasim në qytetin Mogadishu, duke bllokuar kryqëzimin e ngarkuar KM4, raporton Anadolu Agency (AA).
Zyrtari i policisë lokale Abdifatah Hassan tha për AA përmes telefonit se eksplozivi i përdorur në shpërthim ishte një bombë e vendosur përskaj rrugës dhe kishte në objektiv një zyrtar ushtarak.
Ai tha se zyrtari i lartë arriti të shpëtonte i padëmtuar, megjithëse dy prej truprojave të tij dhe një civil u vranë.
Gjithashtu duke folur për AA, zëdhënësi i policisë somaleze Sadaq Adan Ali konfirmoi sulmin, por jo viktimat.
Mediat lokale raportojnë se objektiv i sulmit ka qenë zëvendëskomandanti i ushtrisë së Somalisë.
Asnjë grup ende nuk ka marrë përgjegjësinë për sulmin, megjithëse al-Shabaab, grupi terrorist i lidhur me al-Kaidën me bazë në Somali, ka marrë përsipër sulme të tjera të fundit në vendin e Bririt të Afrikës. /Insajderi.com
