Turqia raportoi 31.712 infeksione të tjera me koronavirus (COVID-19) gjatë 24 orëve të fundit, duke përfshirë 6.213 pacientë simptomatikë, sipas të dhënave të Ministrisë së Shëndetësisë, transmeton Insajderi.
Ndërkaq, 5.846 pacientë janë shëruar ditën e kaluar, duke e çuar numrin në 447.361, ndërsa numri i të vdekurve u rrit në 15.531 me 217 viktima të reja.
Në gjithë vendin janë kryer 204.411 teste të tjera për COVID-19, duke e çuar totalin në mbi 20,29 milionë.
Numri i pacientëve në gjendje kritike tani qëndron në 5.901, megjithëse shkalla e rritjes së rasteve të rënda është në rënie, raporton Anadolu Agency (AA).
Duke folur pas takimit të Bordit Këshillimor Shkencor të Koronavirusit, ministri turk i Shëndetësisë, Fahrettin Koca, tha: “Ka një rritje mbi pesëfish në numrin ditor të rasteve me COVID-19 dhe 55 për qind rritje të vdekjeve krahasuar me kulmin e mëparshëm në prill”.
Turqia do të marrë 50 milionë vaksina kundër COVID-19 në faza duke filluar nga ditët e ardhshme, shtoi Koca. /Insajderi.com
