Vidhen 50 milionë dollarë në banesën e vajzës së bosit të Formula 1

Vidhen 50 milionë dollarë në banesën e vajzës së bosit të Formula 1

Bizhuteri me vlerë 50 milionë dollarë janë vjedhur nga banesa e Tamara Eccclestone në Londër, duke e lënë trashëgimtaren e pasur të “tronditur e të zemëruar”.

Vajza e ish bosit të Formula 1, Bernie Ecclestone, nuk ishte përballur me situata të tilla. Sipas The Sun, asaj i janë grabitur mes të tjerash unaza e vëthë me vlerë, si dhe një byzylyk Cartier me vlerë 80.000 paundë, të cilin 35 vjeçarja e kishte marrë si dhuratë në dasmë. Deri tani nuk është bërë asnjë arrestim, por policia britanike po kërkon për tre burra që kanë qenë brenda godinës në momentin e vjedhjes, dhe që nuk ishin banorë apo punonjës aty.

Të dyshuarit kanë arritur të largohen që përpara se forcat e rendit të thirreshin nga rojet e sigurisë. sipas revistës Forbes, Ecclestone e bleu vilën e saj me 55 dhoma në zonën Kensington në 2011-tën për £45 milionë paundë. Ajo ka shpenzuar miliona të tjerë për ta rinovuar pronën, në mënyrë që të përfshinte dhe një xhakuzi prej kristali, një klub nate privat, një sallë bowling-u, një pishinë e brendshme, një sallon bukurie dhe një SPA për qentë.