Në vitin 2006, Banksy lëshoi qindra kopje të rreme të albumit të parë të Paris Hilton “ Paris”, të kompletuar me këngë të rreme si “Pse jam e famshme?” dhe “Çfarë kam bërë?”, me remikse nga DJ Danger Mouse. Tani, CD-ja ka dalë në ankand dhe Parisi dëshiron një prej tyre.
Duke folur në një intervistë të Bustle, Hilton tha: “Banksy është një artist i vlerësuar dhe mendova se ishte vërtet mirë që ai ka gjetur kohë për të bërë këto 500 albume”.
Ajo shtoi: “Unë në të vërtetë jam përpjekur të blej një album. Po përpiqem të pres një tjetër ankand (të bëhet i disponueshëm) sepse ato janë edicion i limituar. Por mendova se ishte e jashtëzakonshme që ai e bëri atë. ”
CD-të e falsifikuara të Banksy u lakmuan shumë pasi ai i la fshehurazi ato në dyqane të ndryshme diskografike në të gjithë Mbretërinë e Bashkuar. Kopja e vetme u vendos në ankand përmes TateWard Auctions dhe u shit dje për 8,750. Blerësi aktualisht është i panjohur./Insajderi.com
