Transmetuesi “Sky” nuk do të shfaqë konkursin e saj televiziv të zdrukthëtarisë “The Chop” pasi një hetim mbi tatuazhet e fytyrës së një garuesi zbuloi se ato “mund të ishin të lidhura me ideologjitë naziste, shkruan BBC, njofton Insajderi.
Episodi i parë u transmetua në fillim të këtij muaji, por pjesa tjetër e serialit tani është anuluar.
Pjesëmarrësi u akuzua se kishte simbole naziste në fytyrën e tij, por ai mohon që ato të kenë ndonjë kuptim të tillë.
Sky History kërkoi falje dhe tha se po “rishikonte plotësisht” proceset e saj.
Një deklaratë tha se “AETN UK”, e cila drejton kanalin, “kishte marrë vendimin për të mos transmetuar ndonjë episod të mëtejshëm të ‘The Chop on Sky History’” pas një “hetimi të pavarur”.
Aty thuhej: “Tatuazhet e një garuesi përfshinin simbole që mund të lidheshin me ideologji të ekstremit të djathtë dhe mund të shkaktonin ofendim; ne sinqerisht kërkojmë falje për këtë dhe na vjen keq që proceset tona nuk nxitën hetime të mëtejshme në një fazë të hershme”.
“Garuesi vazhdon të mohojë me forcë se ai ka pasur, ose ka pasur ndonjëherë prirje të ekstremit të djathtë. Ne jemi duke rishikuar tërësisht proceset tona të brendshme pas hetimit. AETN UK dhe Sky History qëndrojnë kundër racizmit dhe gjuhës së urrejtjes të të gjitha llojeve”.
Shqetësimet u ngritën për herë të parë kur kanali postoi një klip në mediat sociale javën e kaluar.
Darren Lumsden, nga Somerset i Veriut, u pa me numrin 88 në faqe. Meqenëse H është shkronja e tetë e alfabetit, numri mund të përdoret nga supremacistët e bardhë si kod numerik për “Heil Hitler”.
Shikuesit gjithashtu vunë në dukje shënime të tjera që mund të shoqëroheshin me parulla të supremacistëve të bardhë.
Sky History fillimisht tha që tatuazhet e tij shënonin “ngjarje të rëndësishme në jetën e tij dhe nuk kanë asnjë kuptim politik ose ideologjik”. Numri 88 i referohej 1988, viti i vdekjes së babait të Lumsden.
Sidoqoftë, babai i Lumsden është ende gjallë, sipas “The Sun” dhe “The Daily Mail”, të cilët të dy pretenduan se e kishin gjetur atë. /Insajderi.com
