Që disa kohë lajmet për Dafina Zeqirin nuk kanë të ndalur. Këngëtarja ka pasur një rikthim të bujshëm por jo vetëm në muzikë.
Secilën ditë, Dafina ia del të jetë në lajmet për showbiz, më shumë se për këngët e saj, performancat apo projektet, për aktivitetet e saj në social media.
Dafina lë një koment provokativ në fotot e llogarive të instagramit të kolegëve të saj të estradës, e menjëherë në media do të ketë sugjerime të shumta nëse ajo ka filluar një lidhje të re ose nëse personi është i gjinisë së njejtë atëherë menjëherë do të spekulohet për orientimin e saj seksual, me të njëjtin ekskluzivitet si të ishte hera e parë.
Pothuajse është e pamundur të mos shohësh ndonjë koment të Dafinës tek secila llogari e instagramit të estradës. Ajo duket të ketë vendosur që me çdo kusht të jetë pjesë e lajmeve në media dhe social media.
Dafina merr poza provokative, Dafina bën lëvizje provokative, Dafina bën ‘twerk’ të gjitha këto, duken si thirrje të dëshpëruara të këngëtares për të marrë vëmendje. Instagrami i Dafinës i ngjan atij të një vajze në kulm të adoleshencës. Ndoshta edhe kjo është deri diku normale, sepse yjet kanë nevojë për vëmëndje, por në anën tjetër pothuaj të gjitha portalet që përfshijnë rubrikën e showbizit, e marrin si të ishte ar gjithçka që ju servon Dafina dhe kolegët e saj nëpër social media.
Në këtë pikëpamje duket sikur estrada jonë më shumë se me ngjarje të vërteta, e mban botën e showbizit me fotografi Instagrami, dhe mediat pa pikë filtri marrin atë që u servohet.
