Gjiganti amerikan Toys ‘R’ Us, zinxhiri më i madh i dyqaneve të lodrave për fëmijë në Amerikë, depozitoi kërkesën për mbrojtje nga falimenti, shenja më e fundit kjo e telasheve që kanë përfshirë tregtinë vendase me pakice.
Veprimi i drejtuesve të firmës vë në pikëpyetje të ardhmen e rreth 1,600 dyqaneve me gati 64,000 të punësuar.
Ai vjen në kohen kur Toys ‘R’ Us po përgatitej për sezonin e blerjeve festive, gjatë të cilit regjistrohet dhe numri më i madh i shitjeve.
Edhe pse një lëvizje e tillë nuk nënkupton domosdoshmërish fundin e kompanisë ikonë se themeluar në 1948-ten, ai përben sërish një kapitull mjaft të errët në historinë e saj.
Toys ‘R’ Us ka marrë garanci mbi financime që mbërrijnë në 3 miliardë dollarë nga huadhënës që përfshijnë JP Morgan. Këto para do të sigurojnë furnitorët e saj se do të paguhen për ngarkesat e Lego-ve dhe kukullave Barbie që kanë dërguar për sezonin e festave.
Njësia kanadeze e firmës do të kërkojë edhe ajo paralelisht mbrojtje, ndërsa procedurat do të zhvillohen në Gjykatën e Lartë të Ontarios.
Operacionet jashtë Shteteve të Bashkuara dhe Kanadasë, përfshirë këtu rreth 255 dyqane të licencuara dhe partneritete biznesi në Azi që janë entitete të veçanta, nuk konsiderohen pjesë e procesit të falimentimit.
